കേരള ചരിത്രത്തെ കുറിച്ചുള്ള എന്റെ അപഗ്രധ‍നം

ഞാന്‍ കേന്ദ്രീയ വിദ്യാലയത്തില്‍ പഠിച്ച ഒരു വ്യക്തിയാണ്. ഭാരതചരിത്രത്തെക്കുറിച്ചാണ് കൂടുതലും സിലബസ് പ്രതിപാദിക്കുന്നത്. കേരള ചരിത്രത്തിനെ കുറിച്ച് ഒന്നും തന്നെ പഠിപ്പിക്കുന്നില്ല എന്ന് പറയാം. കേരളത്തിലാണ് പഠിച്ചതെന്ന് ഒഴിച്ചാല്‍ വേറെ കാര്യമായൊന്നും കേരളത്തിന്റെ പൈതൃകത്തെക്കുറിച്ച് ഗ്രാഹ്യം ഇല്ലായിരുന്നു. മറിച്ച് കേരളത്തിനെക്കുറിച്ച് അവിടെയും ഇവിടെയും കേട്ട മുറിക്കഥകളും, പിന്നെ, മാതാപിതാക്കള്‍, സുഹൃത്തുക്കള്‍ എന്നിവരില്‍ നിന്ന് കിട്ടിയിരുന്ന പാതി അറിവുകളുമായിരുന്നു. പക്ഷെ കുറച്ചുകാലമായി വെബ്‌സൈറ്റുകളില്‍ നിന്നും വായിച്ച് കുറച്ച് ജ്ഞാനം ഉണ്ടായി. അങ്ങനെയിരിക്കെ ബാംഗ്‌ളൂര്‍ ബുക്ക് ഫെസ്റ്റിവലില്‍ വെച്ച് ഡി. സി. ബുക്ക്സിന്റെ സ്റ്റാളില്‍ നിന്ന് മൂന്ന് പുസ്തകങ്ങള്‍ വാങ്ങി. വേണാടിന്റെ പരിണാമം(കെ.ശിവശങ്കരന്‍ നായര്‍) സഞ്ചാരികള്‍ കണ്ട കേരളം(വേലായുധന്‍ പാണിക്കശ്ശേരി, കറന്റ് ബുക്ക്സ്), ജാതി വ്യവസ്ഥയും കേരളവും( പി.കെ. ബാലകൃഷ്ണന്‍, കറന്റ് ബുക്ക്സ്). ഇതില്‍ അവസാനത്തെ പുസ്തകം 1983ല്‍ പ്രസിദ്ധീകരിച്ചത് ആണെങ്കിലും പിന്നീട് ഒരു “പൊളിച്ചെഴുത്ത്” നടത്തി വീണ്ടും പ്രസിദ്ധീകരിച്ചതാണ്.

കേരളത്തിന്റെ ഭൂമിശാസ്ത്രപരമായ ഒരു ഐതിഹ്യത്തെക്കുറിച്ച് കേട്ടിട്ടുണ്ടെങ്കിലും അത് ഇത്രയും മാറ്റങ്ങള്‍ സംഭവിച്ചിട്ടുണ്ടെന്ന് ഇപ്പോള്‍ മനസ്സിലാവുന്നു. ഇപ്പോഴത്തെ പല ഉള്‍നാടന്‍ പ്രദേശങ്ങളും ഏകദേശം ആയിരം വര്‍ഷങ്ങള്‍ക്ക് മുമ്പ് കടലോരം ആയിരുന്നു എന്നും ഇന്നത്തെ കൊടുങ്ങല്ലൂര്‍, അരൂര്‍, കായംകുളം, കൊല്ലം എന്നീ പ്രദേശങ്ങള്‍ ചെറുദ്വീപുകള്‍ പോലെ ആയിരുന്നു എന്നുള്ളതും ഒരു പുതിയ അറിവായിരുന്നു. പക്ഷെ ഇതിനെക്കുറിച്ച് ശാസ്ത്രീയമായ പഠനങ്ങള്‍ ഒന്നും തന്നെ കണ്ടില്ല. ( വെബ്ബില്‍ മാത്രമേ തിരഞ്ഞുള്ളൂ.Google scholar -ലും കൂടെ സെര്‍ച്ച് ചെയ്തിട്ടും citations പോലും കണ്ടില്ല...ഒരു പക്ഷെ എന്റെ keywords ശരി അല്ലായിരിക്കാം.)